मॆगेलॆ उत्तर
पयरि रष्यांतु “उल्काघात जाव्नु हजारो भरि लोकांक गायु जालेलॆ आम्मि पूरा वाज्जूनु आस्सति. दुसरे महायुद्ध वेळ्यारि जपानाचॆ हीरोसिमा वयरि पडिलॆ ३० बांबाक हाज्जॆ शक्ति सम खंयि. ताज्ज हॆर्दीसूचि एक क्षुद्रगृह भूमंडला लाग्गि हाय्दुनु घॆल्लॆ. हाज्ज शक्ति सुमार १००० बांबाक सम खंयि. ब्रह्मांडांतु अस्सलॆ घटना थंय्थंयि प्रति क्षण नित्य निरंतर जाव्नु चल्ता उरता. आनि पयरि चलेलॆ तांतुलॆ मस्त सान घटना. चिक्कॆ समाधान जाव्नु बैसूनु विचार करा. रष्यांतु उल्काघात जालेल वरि त्या क्षुद्र गृह सैत भूंय्चॆरि पळ्ळिलॆ जाल्यारि भूमंडलांतु खंचॆ नमून्या अल्लोल -कल्लोल जात्ताश्शिलॆ? कित्लॆ जीवहानि, आस्ति नाश जात्ताश्शिलॆ न्हंहिवे? ब्रह्मांडाचॆ हे सान घटने दाकूनु भूंय्क इत्लॆ अपरिमित लुक्सान जावचॆ फाव आसताना ब्रह्मांडांतु घडचॆ इतर घोर आकस्मिक घटना भूंय्चॆरि घडील जाल्यारि, ताज्जेन जाव्चॆ लुक्सान कित्ल म्हॊणु मॆज्जूचाक सैत जायसना. जाल्यारि वातावरणांतु खंचेरि आधार नाशि पॊव्ता आस्सुचॆ अस्सलॆ आकाश काय भूंय्चॆ वातावरणाक रिगचॆ भित्तरि त्या स्पोट जात्त खंयि. आनि कुड्कॆ कुड्कॆ जाव्नु फुट्टूनु वत्त खंयि. वातावरणांतु स्वच्छंध जाव्नु बोव्नु-घूव्नु आस्सुचॆ आकाशकायाचॆ आयश्य भूंय्चॆ वातावरणाक ऎव्च भित्तरि संप्ता म्हॊणु जाल्यारि हाज्ज मागशि खंचकि शक्ति आस्स म्हणचॆ तुमका नजराक यानावे?म्हळयारि भूंय्चॆ वैलॆ जीवराशि राकचांतु निसर्गाचॆ एक शक्ति काम कर्ता आस्स म्हॊणु जाल्ल न्हंहिवे? तश्शि जाल्यारि खंचॆ त्या शक्ति? जीविन वांचुनु उरचाक अत्यगत्य जालेलॆ पंचभूत म्हणतातिकि? ना आम्मि पूरा भक्तीन पायपॊडचॆ अखिलांड कोटि ब्रह्मांड नायक परमात्मुकि? कोण? आमगेलॆ म्हालगड्यान ताक्कायि देवु म्हळ्ळशि दिस्ता. आम्मि समजिलि वरि हे ब्रह्मांडाचॆ सृष्टि, स्थिति, लयकर्तु जाव्नास्सुक पुरॊ, जांवॊ त्या अखिलांड कोटि ब्रह्मांड नायका दाकूनु नेमणूकि जाव्नास्सुक पुरॊ. नांवॆ पंचभूताचॆ शक्ति जाव्नास्सुक पुरॊ. खंचे जाल्यारिचि ताज्जेन घड घडेक जीवराशिचॆ राक्वण(रक्षण) जात्ता आस्सुचॆ मात्र पट्टिक न्हंहि. तॊं कोण? खंचॆंतु आस्स म्हॊणु आमगेलॆ अज्ञानाचॆ दोळ्याक दीस्नाशि वच्चुक पुरॊ जाल्यारिचि ताणॆ आस्सुचॆ मात्र खंडित!
त्या कारणान देवु-दैव कस्सलॆ ना म्हणचॆ तिरस्कारु नाक्का. आमका देवाक प्रत्यक्ष जाव्नु पॊळोवचाक जायनाशि आस्सुक पुरॊ, जाल्यारि तागेलॆ सृष्टि जालेलॆ विंगड जीव-जंतुंक पॊळोव्नु तांचॆ राक्वण, अभिवृद्धिक आमचेन जालेलॆ तित्तुलॆ मद्दत् कॆलयारि. आमगेलॆ त्या साधनॆंतु देवु निप्पूनु बैसूनु आसता. आनि आमगेलॆ सर्व कार्यांतु यश हाणु दित्ता. देवाक नंब्गूनु कोण खंचॆ काम चालु करतातिकि तांका यश प्राप्त जात्ता म्हणचॆ सर्वविधित, त्या खात्तिरि आमगेलॆ संस्कृतिंतु कुलदेवु आनि इष्ट देवाक तित्तुलॆ महत्व दिलेलॆ. आधुनिकतॆ कित्लॆ जाल्यारिचि देवा वयरि श्रद्धा दवरूनु चमकितल्याक कॆदनांयि यश म्हणचॆ बांदूनु दिलेलॆ गांटि वरि. ताक्का स्तुति कोर्नु, प्रसन्न कॊरचॆ बरशि तागेलॆ दुसरॆ चर्डुंव जालेलॆ जीवजंतुंक उपद्रव दिवचॆ अप्रिय कार्य कर्नाशि आस्सुका.!
सर्वांक देवु बरॆ कॊरॊं - आर्गोडु सुरेश शॆणै, संपादकु
ಕಾಮೆಂಟ್ಗಳಿಲ್ಲ:
ಕಾಮೆಂಟ್ ಪೋಸ್ಟ್ ಮಾಡಿ