विश्व कॊंकणि केंद्र: विद्यार्थि वेतन वांटिलॆ
कॊंकणि भाष आनि संस्कृतिक उत्तेजन दिवचॆ खात्तिरि विश्व कॊंकणि केंद्राक कर्नाटक सरकारान घोषण कॆलेलॆ ५ कोटि रुपया पैकि देड कोटि रूपयि इत्तुलॆ भित्तरि हस्तांतर कॆल्ल्या. व्हरलीलॆ दुड्डु हंतहंत जाव्नु दित्ताति. म्हॊणु कर्नाटक मुख्यमंत्रि जगदीश् शॆट्टर् तान्नि सांगलॆ. तान्नि २५-०८-२०१२ दिवसु मंगळूरांतु “विश्व कॊंकणि केंद्रा तरपेन चलेलॆ विद्यार्थि वेतन वांटप समारंभाचॆ मुखेल सॊयरॆ जाव्नु येव्नु उलैताश्शिलॆ. आनि हे वेळ्यारि तान्नि १० लोक विद्यार्थ्यांक सांकेतिक जाव्नु विद्यार्थि वेतन वांटिलॆ.राज्यसभा सदस्य अस्कर् फॆर्नांडीस् हे कार्यक्रमाचॆ उद्घाटन कॆल्लिंति. आनि आपणालॆ भाषणांतु “विश्वकॊंकणि केंद्रान घाल्नु घॆत्तिलॆ हे काम स्तुत्यर्ह, आमगेलॆ चर्डुंव चांग जाव्नु शिक्कुनु मंगळ ग्रहाक वच्चुनु यव्वॊंति म्हॊणु आशय व्यक्त कॆल्लिंति. आनि तान्नि सांकेतिक जाव्नु ५ लोकांक विद्यार्थि वेतन वांटिलॆ. ब्लोसं फॆर्नांडिस् उपस्थित आश्शिलॆ.
मणिपाल् यूनिवर्सल् लर्निंग् संस्थॆचॆ अध्यक्ष टि.वि. मोहन्दास् पै तान्नि दिक्सूचि भाषण कॆल्लिं. सगळॆ देशांतु आस्सुचॆ १२१ कोटि जन संख्यॆंतु कॊंकणि भाषिगालॆ अंकडॊ मस्त ऊणॆ. आमका राजकीय इच्छा शक्ति दाखय्चॆ त्राण ना., अर्थिक त्राण ना. जाल्यारि चांग बुद्धिमत्ता आस्स. आर्थिक जाव्नु अशक्त जाव्नास्सुचॆ आमगेलॆ भाषॆचॆ विद्यार्थ्यांक चांग उन्नत शिक्षण मॆळच वरि कॊरचॆ मूखांतर २०२० चॆ सुमाराक जागतिक जाव्नु बलिष्ट कॊंकणि समाज निर्माण कॊर्का जाल्ला म्हळ्ळिंति.
विश्व कॊंकणि विद्यार्थि वेतन निधिचॆ अध्यक्ष रामदास् कामत् यु. तान्नि येव्कार कॆल्लॆ. विद्यार्थि वेतन निधि आनि ताज्जॆ फलानुभवि अंकडॊ वषाचान वर्षाक च्हड जात्ता आस्स. २०१०ंतु ५० लाक् रू. आश्शिलॆ मॊत्त अवुंदु २ कोटि रू.क चळ्ळा. २०२०भित्तरि २५,००० लोक कॊंकणि भाषॆचॆ विद्यार्थ्यांक विद्यार्थि वेतन वांटूचॆ उद्देश आस्सुनु हाक्का सुमार ८ताकूनु १० कोटि रू. दुड्डु जाव्का जात्तलॆ म्हळ्ळिंति.
अखिल कर्नाटक कॊंकणि खार्वि महा जन सभाचॆ अध्यक्ष कॆ.बि. खार्वि गौरव सॊयरॆ जाव्नु आय्यिलॆ. विश्व कॊंकणि केंद्रचॆ अध्यक्ष बस्ति वामन शॆणै तान्नि अध्यक्षता घॆत्तिलॆ. भावैक्यता कॊंकणि लोकालॆ रगतांतु आस्स. तश्शि जाव्नु कॊंकणि संबंध पाव्नु चांग काम्म घडता आस्स. हे चरित्रा आमगेलॆ मुखावैलॆ पीळिगेक पावैचॆ जवाब्दारि तुम्चेरि आस्स. म्हॊणु तान्नि विद्यार्थि वेतन घॆत्तिलॆ युव जनांक आपोव्णि दिल्लि.
विधान सभा उप सभाध्यक्ष ऎन्. योगीश् भट्, जिल्ला उस्तुवारि सचिव सि.टि. रवि, संसद नळिन् कुमार् कटीलु, विधान परिषत् सदस्य क्या। गणेश् कार्णिक् हे समारंभांतु उपस्थित आश्शिलॆ. विद्यार्थि वेतन निधिचॆ कार्यदर्शि प्रदीप् जि. पै तान्नि आबार मानलॆ. महेश् नायक् तान्नि कार्यक्रम निर्वहण कॆल्लि. विद्यार्थि वेतन घॆत्तिलॆ विद्यार्थि तरपेन दॊग्ग लोक उलैलॆ. विद्यार्थि वेतन स्वीकार कॆलीलॆ युवजन ऒट्टू तांगॆलॆ पोषक व्हड संख्यारि हे संदभारि उपस्थित आश्शिलॆं.
ಕಾಮೆಂಟ್ಗಳಿಲ್ಲ:
ಕಾಮೆಂಟ್ ಪೋಸ್ಟ್ ಮಾಡಿ