मॆगेलॆ उत्तर (15-01-2013)

पय्रि हांवॆ कुलदेवळाक गोंय्क वच्चुनु यत्तास्ताना एकळॊ सह प्रयाणिकान माक्केक प्रश्नॆ विचार्लॆ. “पळेया सार् सरायि पिव्चॆ, बीडि, सिगरेट तांडचॆ, ड्रग्स् घॆव्चॆ डेंजरस्, आमगेलॆ आरोग्य पाड करता, म्हॊणु तुम्मि सांग्तामू! तश्शि जाल्यारि खंचे चट नात्तिल्याक हुषार नाशि जायनांवॆ? म्हणचेचि त्या प्रश्नॆ. हाक्का खंचॆ नमून्यान जवाब दिव्का म्हॊणु माक्का थॊडॆ वेळु गडबड जालेलॆ व्हयि. जाल्यारि सत्य कॆद्नायि स्पष्ट जाव्नु आस्ता. हांवॆ ताक्का एक लॊक्कंडा तांबिया उदाहरण दिल्लॆ.      कस्सलॆ म्हळयारि चर्डुंव खॆळ्ता आसताना एक तांबियाक मात्ति सारोनु कूस्सड कोर्नु दवरताति आनि आन्नेक तांबियो मात्ति(जंग) खाव्नु कूस्सड जाव्नु आस्ता. पळैचाक दॊन्नीचि कूस्सडशि दिसल्यारिचि तांतु फरक आस्स न्हंहिवे? मात्ति लाग्गूनु जाल्लिलॆ कुस्सड धुल्यारि वच्चुनु सॊड्ता. त्यांचि जंग लाग्गिलॆ कूस्सड तांबियाक लुक्सान कर्ता उर्ता. तश्शिचि आमगेलॆ शरीरा विषयांतु सांका म्हळयारि सोरो पीव्नु, सिगरेट तांडूनु, ड्रग्स् घेव्नु अंत, श्वासकोश, किड्नि इत्यादि अंगाक जालेलॆ लुक्सान सम कॊरचाक जायना. म्हळयारि तांबियॊ मात्ति खाव्नु हळु हळू ऒट्टॊ जाव्नु वच्चॆ वरि त्या अंग सैत ऒट्टॊ जावचाक पुरॊंति. तॆद्दना दॆक्कु पॊडचॆ लक्षण दूखि मात्र जाल्यारिचि रिपेरि कॊरचाक जायनाशि ताज्जेन मरण थांयि यवचॆ फाव आस्ता. त्यांचि टॆन्‌शन्नानकि, इन्‌फॆक्षन्नानकि नांवॆ आहारांतु च्हड -कम्मि जाव्नु हुषार नाशि जाल्यारि ताक्का अगत्य चिकित्सॆ नांवॆ वाक्कद दिलयारि गूण जात्ता. हाज्जेन शरीराचॆ अंगाक खंचे लुक्सान आस्स जायना. म्हळयारि त्या अंगाक लाग्गिलॆ कूस्सड च्हॊख जात्ता.
हे कळ्यारिचि आत्तात्त संतोषाक पार्टि, दुःख आय्यिलॆ तॆद्दना सोरो पिवचॆ अभ्यासु च्हड जात्ता आस्सुचॆ खरेचि दुरदृष्टा खबर. सोरॊ बीर, विस्कि इत्यादि खंचॆ नमून्यान आसलेरि तांतास्सुचॆ आल्कोहाल् आमगेलॆ शरीराक लुक्सान करनाशि सोणा. दुष्टानि कित्लॆचि संभावितालॆ वेषु घाल्यारिचि  तागेलॆ दाकूनु उपद्रव कश्शि चुकनांकि, तश्शिचि हे सोरो कित्लेचि म्होवाळ आसलेरिचि शरीराक ताज्ज निमित्त जाव्चॆ लुक्सान बरोनु सांगचाक जायना.  ताज्जेन दुड्डु तित्लेचि न्हंयि, आरोग्यायि पाड जात्ता. घरांतु एकळॊ संपादन कॊरचॆ मनुष्यालॆ आरोग्य पाड जाल्लॆ म्हळयारि त्या घर्‍चॆ सर्वालॆ समाधान, सूख नाश करता.  सोरॊ पित्तालॊ त्या पिवचॆ दाकूनु आपणाक सूख, संतोषु मॆळता म्हॊणु लॆकता. जालयारि  ताज्ज दाकूनु आप्पण अनारोग्याक पोणु दूखि, कष्ट भॊगचॆ न्हंहिसि, घर्‍चालॆ, कुटुंबाचॆ सर्वालॆ सूख-संतोष नाश करता म्हणचॆ विसर्ता.  त्या खात्तिरि आम्मि कॆदनांयि याद दवरूनु घॆव्का. तत्कालांतु मॆळेचॆ थॊडॆ सुखा खात्तिरि जीवनाचॆ समस्त सूख पाड कोर्नु घॆवकावे? तत्कालाचॆ दुःख विसरचाक जीवन पूर्ति दुःख आपोव्नु घॆव्कावे? वॆंचूनु घॆव्चॆ जवाब्दारि तुमगॆलेचि, कितयाक म्हळयारि ताज्ज परिणाम भॊगतालिं तुम्मी न्हंहिवे?
सर्वांक देवु बरॆ कॊरॊं    - आर्‍गोडु सुरेश शॆणै, संपादकु