कार्कळांतु कॊंकणि गौरव प्रशस्ति पावित
“ज्ञान आस्स कोर्नु घॆव्चॆ दाकूनु जीवन सार्थक जात्ता. हे निट्टांतु कॊंकणि समाजाचान  शैक्षणिक, वैद्यकीय, धार्मिक, सामाजिक, राजकीय क्षेत्र समेत सर्व क्षेत्राक अनन्य देणिगा दिल्ल्या, कॊंकणि समाज लोकालॆ भाषा संस्कृतियुत जीवन म्हॊणु कर्नाटक विधानसभा उप सभापति ऎन्. योगीश् भट् तान्नि सांगलॆ. तान्नि कर्नाटक कॊंकणि साहित्य अकाडॆमि तरपेन  नवॆंबर् ११क कार्कळ श्री बि. मंजुनाथ पै सभांगणांतु घडीलॆ कॊंकणि गौरव प्रशस्ति- पुस्तक बहुमान पावित समारंभ उद्घाटन कोर्नु, गौरव प्रशस्ति प्रदान कोर्नु उलैताश्शिलॆ.
अध्यक्षतॆ घॆत्तिलॆ शासक ऎच्. गोपाल भंडारि तान्नि “कॊंकणि अकाडॆमि दाकूनु कॊंकणिगालॆ कलॆ, संस्कृति, परंपरॆ वरोचॆ काम जांवॊ.  म्हॊणु सांगलिंति. सम्मानितांगॆलॆ परिचय पुस्तक उग्तावण कोर्नु, पुस्तक बहुमान प्रदान कॆलीलॆ  विधान परिषत् सदस्य क्या। गणेश् कार्णिक् तान्नि उलोव्नु “चर्डुवांक भाषॆ, संस्कृति शिकोव्चॆ काम कॆलील तॆद्दना आकाडॆमि स्थापन कॆलीलॆ  सार्थक जात्ता. म्हळ्ळिंति. माजि शासक वि. सुनिल् कुमार् तान्नि फॆलोशिप् वांटिलॆ.
कॊंकणि साहिति वलेरियन् डि’सोजा (वल्लि वग्ग) तान्नि युव प्रशस्ति प्रदान कॆल्लि. राष्ट्र प्रशस्ति विजेत गोपालकृष्ण पै तान्नि अकाडॆमि वार्ता संचिकॆ ’कॊंकणि उज्वाडु’चॆ उग्तावण कॆल्लि.
प्रशस्ति पुरस्कृत: बॆंगळूर्‍चॆ साहिति शा. मं. कृष्णराय, मुंबय्चॆ रंगनट हॆरि डि’सोजा आनि उडुपिचॆ जानपद कलाविद बाबि नायक् तांका गौरव प्रशस्ति, साहिति जालीलॆ म्याक्सिम् जॆ. पिंटॊ, रोन् मैकॆल् मत्तु रॊनाल्ड् वाज् तांका पुस्तक बहुमान, कुंबारिकॆ कलॆचॆ महादेवि कुलाल्, वर्णचित्र कलॆचॆ विलास् नायक् आन्ति शास्त्रीय संगीताचॆ महालक्ष्मी शॆणै तांका युव प्रशस्ति प्रधान कॆल्लि. विद्या जॆ. नायक्, मार्सॆल् ऎं. डि’सोजा, विक्टर् डि’सिल्वा, सावॆर् संतान् सिद्धि आनि कॆविन् मिस्कित् तांका फॆलोशिप्  वांटिलॆ.
अकाडॆमि अध्यक्ष कासरगोडु चिन्ना येव्कार कोर्नु प्रस्तावन कॆल्लिंति. रिजिस्ट्रार् डा। बि. देवदास् पै तान्नि आबार मानलॆ. सदस्य जालीलॆ सुभाष् कामत्, महेश् आर्. नायक्, चिदानंद भंडारि, टि.ऎ.पि. शॆणै, राय् क्यास्टॆलिनो आनि ओं गणेश् तान्नि ऒळक कोर्नु दिल्लि. फ्लोरिन् रोश् आनि कुंब्ळॆ नरसिंह प्रभु तान्नि कार्यक्रमाचॆ निरूपण कॆल्लि