श्री हॆच्. आर्. प्रभाकर प्रभुंगॆलॆ पॊरनॆं वस्तु संग्रह आनि प्रदर्शन

मागशि कालांतु हिंदूस्तान खेडॆ गांव्चान भोर्नु घॆल्लिलॆ. चड्त लोक कृषिक जाव्नाश्शिलॆ. मागशि कालांतु सर्व नित्य वापरचॆ जीवनावश्यक वस्तु स्वतः नांवॆ सांप्रदायिक नमून्यान तयार कोर्नु घॆत्ता आश्शिलॆ. जाल्यारि आयचॆ वर्तमान कालांतु आम्मि पाश्चात्य संस्कृतिचॆ अंदानुकरण कर्ता आमगेलॆ पॊरनॆ कालाचॆ वस्तु-विशेष तर्नाटॆंक सम जाय्ना म्हणचॆ कारण सांगूनु एक्केका मुल्लॆंतु घाल्ता आयलींति. आनि तस्सालॆ वस्तु पूरा हळू हळू कालगर्भांतु नामावशेष जात्ता आस्स.
एक कालांतु लोकान तांग तांगॆलॆ जीवनांतु वापर्‍ता आय्यिलॆ कित्लकि सामानु आजि आधुनिकतॆचॆ अति मोहान मायक जात्ता आस्सति. तांतुलॆ मात्या आयदन बायर उड्डयता आसलेरि, तांबॆ, पित्लि, लॊक्कंडा आयदन गुजरिक घाल्ता आस्सति. हाज्जेन परंपरागत जाव्नु एक जनांगा थाकूनु आन्नेक जनांगाक कॊंडि म्हॊणॊनु घॆवचॆ हे माक्सिचालॆ सामान, आयदन नाशि त्या कॊंडि चुक्कुनु वत्ता आस्सुचॆ दुरदृष्टा विषयु म्हॊणका. अस्सलॆ निराशादायक संदभारि आमगेलॆ एकळॆ अस्सलॆ पुरातन वस्तु संग्रह कोर्नु जनांगाक महदुपकार करता आस्सति. तान्नीचि शिवमॊग्ग जिल्लॆ तीर्थहळ्ळि ता॥ कोणंदूराचॆ श्री हॆच्.आर्. प्रभाकर प्रभु.
घॆलेलॆ तीस वर्षा ताकूनु तान्नि हे कार्य करता आस्सति. हांगॆलॆ संग्रहांतु कर्नाटकांतु राज्यभार कॆलीलॆ गंग, कदंब, राष्ट्रकूट, विजयनगराचॆ रायालॆ, मैसूरु रायालॆ कालाचॆ मात्र न्हंहिसि विदेशा दाकूनु हांगाक यव्नु राज्यभार कॆलेलॆ फ्रॆंच्, डॆच्छ कालाचॆ पावलि, बरह पळयचाक मॆळता. ताज्ज बर्शि मलेष्या, झांबिया, अर्जंटैना, इटलि आदि २० पशि च्हड राष्ट्राचॆ नॊट्ट आनि पावलि हांगेलॆ संग्रहांतु आस्स.  तश्शीचि मैसूरु महाराजालॆ फ्रेम् घालेलॆ लग्न पत्रिका, बाय्ल मन्शॆलॆ कूर्‍टा पट्टॊ, रुक्काचॆ वाट्टॊळि, रंगोलि वाट्टोळि, माकशि कालांतु वापुर्ता आश्शिलॆ पाव, चटाक, सिद्दॆ, सेरु, मॆज्जूचॆ तूका फात्तॊरु, सान जालेलॆ लोहाचॆ क्यालॆंडर्, तांबॆचॆ शासन, दोन रूपयाचॆ स्टांप् पेपर्, ब्रिटिष् कालाचॆ पत्र, कन्नड भाषॆंतुलॆ कुरान् प्रति, उर्दु भाषॆंतु आस्सुचॆ रामायण आनि महाभारत प्रति, मस्त इत्लॆ देशाचॆ स्टांप्, पोस्ट कवर्‍स्, अश्शींचि सांग्रा घॆलयारि ताक्का अंत्य म्हॊणु ना.
श्री हॆच्. आर्. प्रभाकर प्रभु हान्नि इत्लॆ भित्तरि हाज्ज प्रदर्शन लाग्गि लाग्गि पंच्वीस कडेन कोर्नु लोका ताकूनु शहबास्‌गिरि घॆत्तिल आस्सुनु “आयचॆ तर्नाटॆंक आमगेलॆ संस्कृति, इतिहासु कॊळच वरि कॊरचाक आनि तांका जागोवचाक आप्पण कर्ता आस्सुचॆ एक प्रयत्न, घॆलेलॆ तीस वर्षा दाकूनु निरंतर जाव्नु कर्ता आस्स. म्हणताति.
प्रदर्शन नात्तिलॆ वेळ्यारि हे सर्व सामान ब्यांक् लाकरांतु दवरूनु ताज्ज रक्षण योग्य नमून्यान श्री प्रभाकर मामु करता आयलींति.  खंयिंचि अस्सलॆ प्रदर्शनाक आपयलेरि यव्चॆ-वच्चॆ खर्चु सोणु विंगड खंचेयि खर्चु हान्नि विचार्नाति. कोणेयि प्रदर्शन दिवचाक आपयल्यारि हांगॆलॆ साताठ लोकालॆ तंड कॆदनांयि तयार जाव्नु आस्ताति. इत्लॆ न्हंहिसि कोणालाग्गि तरि अस्सलॆ पुरातन वस्तु, विशेष आसल्यारि हान्नि दुड्डु दीव्नु खरीदि कॊरचाक सैत तयार आस्सति.
आमगेलॆ समाजांतु वर्षंप्रति समाज डे, गणेशोत्सवु, शारदोत्सवु, प्रतिष्ठा दिवसु इत्यादि कार्यक्रमु चल्ता उर्‍ता. तस्सालॆ संदर्भारि श्री हॆच्.आर्. प्रभाकर माम्मालॆ  हे अपरूपाचॆ पुरातन वस्तु, स्टांप् प्रदर्शन व्यवस्था कॆलयारि समाजाचॆ तर्नाटॆंक आमगेलॆ पुरातन संस्कृति, इतिहासाचॆ चांग ऒळक जावचांतु अनुमान ना. आजि मिषनरि ताकूनु तयार कॊरचॆ खंचेयि वस्तु पशि चांग विन्यास, लाय्क गुणमट्टाचॆ परंपरागत हे सामान तयार कॊरचाक हात्मुळांतु मॆळचॆ वस्तु वापर्‍लिलॆ हाज्जेन दॆक्कुपड्ता. आनि ताज्ज वय्रि सॊडैता आश्शिलॆ चित्तर, ताज्ज प्राचीनता हे पुरा पळैतना खंडित तॆद्ना काळ कित्लॆ पुष्कळ जाव्नाश्शिलॆ म्हणचॆ कल्पन आम्का यत्ता. श्री हॆच्. आर्. प्रभाकर प्रभु हांगेलॆ पोन् नं. ९४४८९२१९३५ जाव्नास्स. कॊंकणि अकाडॆमिचान सैत अस्सलॆ साधनाशीलांक अगत्य प्रोत्साह दिवका म्हॊणु सरस्वति प्रभा आग्रह कर्ता.
तश्शीचि कोणालाग्गि तरि पॊरनॆ वस्तु, विशेषता, स्टांप् आसलेरि तान्नि ते श्री प्रभाकर प्रभुंक दीव्नु त्या विशेषता मुखावैलॆ जनांगाक उरोनु दिवका. अस्सलॆ अपरूपाचॆ काम करता आस्सुचॆ श्री प्रभु मामु खरेचि अभिनंदनार्ह. तांका देवु बरॆं कॊरॊ.