प्रवासा म्हणके जीवन!

- आर्‍गोडु सुरेश शॆणै, संपादकु

१५-०१-२०११चॆ मॆगेलॆ उत्राचान विंचिलॆ

     आमगेलॆ हे शरीर, हातु, पायु, आंग भोर्नु, गॊरों जाव्नास्सलेरि पूरा लोक “पळे, तॊ(ती) कित्लॊ गॊम्टॊ आस्स म्हणताति. हे बायचान प्रतियॆक्ल्यांक सामान्य दृष्टिक दिसता. त्यांचि शरीरा बित्तर खांय्तरि अनारोग्य आसलेरि त्या विषयांतु तज्ञ जाव्नास्सुचॆ  डाक्ट्रांक मात्र कळता. उरील्यांक फक्नॆ कळ्ना. तश्शिचि हे जगांतु दुड्डु, संपत्ति आसलेरि पूरा भोग, भाग्य, सूख आस्स कोर्नु घॆव्येत म्होणु आम्मि पूरा समझूनु आस्सति. त्या खात्तिरिचि दुड्डाश्शिल्यांक समाजांतु मान, सन्मान पूरा मॆळता आसता. म्होणूयि पूरा लोक दुड्डु, संपत्ति, कीर्ति जॊडचाक आपणालॆ सर्व आयुष्य व्यय करताति. कपाट भरि वज्र, वैडूर्‍य, ब्यांकांतु कोटि कोटिगट्लॆ दुड्डु दवोर्नु, रावळा तस्सालॆ घर बांदुनु, हात्ताक, पाय्याक एक्केक आळु-काळांक दवरूनु घेवूनु घॆतलेरिचि खंचकि असुख आनि असमधानान वळवळताति. दुड्वान सुख, समाधान ना म्होणु समजूनु आनि खंचेनकि मॆळत म्होणु तॆक्कडॆ धांवताति.
तुम्मीचि ल्याक घाला. तुम्मि एक प्रवासाक भायर सरलींति म्होणु समझॆया. तुम्मि एक्लिंचि चार्‍चार ब्याग घेव्नु घॆलयारि तुमगेलॆ प्रवासु सुखांतु जात्तवे? तस्सालॆ प्रवासु तुमका प्रयास जावचाक पुरॊ! नैशि घॆलेलॆ कडेन सामानु सवरगान  मॆळता म्होणु घॆत्ता घॆलयारि तॆदनांयि प्रवासाचॆ गोडि भॊगचाक जायना. हॊरलेलॆ जांवॊ घॆत्तिलॆ सामानु दवरचॆ, हॊरचॆ, काडचॆ,  मागिरि ते राकचॆ हाज्ज किर्‍किरि मध्यॆ प्रवासा गम्मत्त भॊगचाक खंय वेळु आसता?
     तश्शीचि आम्मि हांगा विपरीत दुड्डु, संपत्ति जोड्नु भोग, लालसेंतु मग्न जालयार जॊड्चॆ, राकचॆ बित्तर जीवन प्रयासकर जात्ता. जन्माक आय्यिलॆ उद्देश सफल जायना. मनुष्यु यत्तना कस्सले हाणा, तश्शीचि परत वत्तानांचि कस्सलॆ होर्ना. मध्यॆ आमका हे दुड्डु, संपत्ति, भोग लालसा कितयाक यत्ता? ते प्रकृति गुण. संघ दोष म्हणतामू! तश्शि!! आम्मि घरा बायर वत्तना पाय्याक चिक्कोलु लागचाक नज्ज म्होणु व्हण घाल्नु घॆव्नु वत्ताति. जालयारि जीवाचॆ प्रगतीक मारक जालेलॆ दुड्डु, संपत्तिचॆ चिकलांतु पोणु प्रगतिचान प्रपात बगलेन चम्किता, परत परत हे जनन, मरणाचॆ चक्रांतु शिर्‍कूनु वळवळ्ता आस्तति. आम्मि हे कर्म भूंयंतु पाप शेष जरोनु, पुण्य फल वृद्धि करता घॆलयार मात्र अभिवृद्दि. दुड्डु, संपत्ति आसलेरिचि त्या कॊरचाक जात्ता.
सर्वांक देवु बरॆ कॊरॊं -