कर्नाटक कॊंकणि साहित्य अकाडॆमि कुमटांतु गौरव प्रशस्ति पावित

“कॊंकणि म्हळ्ळ सता तान्नि आम्चगॆलेचि म्हण्चॆ भावना ऎत्ता. कॊंकणि भाषॆक सर्कारान अधिकृत मान्यता दिल्ल्या. कॊंकणि अकाडॆमि कॊंकणि भाषिका खात्तिरि वाव्रो कर्ता आस्सुचॆ श्लाघनीय. अल्पसंख्यात खात्तिरि सर्कारचान मॆळ्चॆ सर्व सौलभ्य कॊंकणिगांक दिवैचाक प्रयत्न कर्ता म्हॊणु शासकि शारदा शॆट्टि तान्नि सांगलॆ. तान्नि ता. २५-०५-२०१३ दिवसु कॊंकणि साहित्य अकाडॆमि तरपेन कुमटांतु चलेलॆ  गौरव प्रशस्ति-पुस्तक बहुमान पावित समारंभ दीवलिं पॆट्टॊनु उद्घाटन कोर्नु उलैताश्शिलॆ.
 घॆलेलॆ सालांचॆ गौरव प्रशस्ति मंगळूर्‍चॆ पौल् मॊरास्, हॊन्नावर्‍चॆ कृष्ण भवानि शंकर भट्(कृष्णशर्मा) आनि कुंदापुर आर्‍गोडाचॆ गोविंदराय शॆणै तांका हे संदर्भारि पावित जाल्लॆ. पुस्तक बहुमान मंगळूर्‍चॆ फा। डा। पियुस् पडॆलिस् पिंटो,  मंगळूर्‍चॆ किन्निकंबळाचॆ तारा लविना फर्नांडिस् आनि मुंबै निवासि अरुणाराव् तांका दिल्लॆ. युव पुरस्कार मंगळूर्‍चॆ अंकुश्. ऎन्. नायक, मंगळूर्‍चॆ वियानि आंटोनियॊ डिकुन्हा, मंगळूर्‍चॆ रामकृष्ण नायक.वि., आनि अंकोलाचॆ अंधयुवक नारायण भगवान् राय्कर् तांका प्रधान कॆल्लॆ. प्रास्ताविक जाव्नु  अकाडॆमि अध्यक्ष कासरकोडु चिन्ना तान्नि उलैलॆ. साधकांगॆलॆ परिचय पुस्तक प्रान्सिस् फर्नांडिस् तान्नि उग्तावण कॆल्लॆ. गौरव सॊयरॆ जाव्नु  विनोद प्रभु, प्रान्सिस् फर्नांडिस्, वीरान् साहेब्, रोहिदास नायक आनि अकाडॆमि रिजिस्ट्रार् डा॥ देविदास पै तान्नि उपस्थित व्हरलीलॆ. अकाडॆमि सदस्य ओंगणेश तान्नि कार्यक्रमाचॆ निरूपण कॆल्लि. सदस्य जालिलॆ सुभाष कामत, राजाराम नायक, मंजुनाथ सिद्धि, महदेव रॆड्डि कुट्टिकार्, यं अशोक शेट्, टि.ऎ.पि.शॆणै, बि. ऎस्. कामत, महेश नायक, चंद्रकांत कामत हान्नि अगत्य सहकारु दिल्लॆ. सदस्य चिदानंद भंडारिन आबार मानलॆ. मागिरि विजेता भंडारि सांगातिन, वॆंचर्स् कुमटा, सीमा सांगातिन, मैकल् रॊड्रिग्स् सांगातिन  कॊंकणि नृत्य, मॊहमद् अलि उपरकर सांगातिन धप् नृत्य, कार्कळद पल्लवि पंग्डा दाकूनु “अम्मिसॊणांति म्हण्चॆ कॊंकणि नाटक प्रदर्शित जाल्लॆ.