श्री राममंदिर कॆसरगॆद्दॆ, बॆळुवायि
बॆळुवायि कॆसरगॆद्दॆचॆ श्री रामंदिरांतु श्री रामदेवालॆ प्रतिष्ठा दशमानोत्सव प्रयुक्त श्री काशी मठाधीश श्रीमद् सुधींद्र तीर्थ स्वाम्यांगॆलॆ शुभाशीर्वादु घेव्नु, तांगॆलॆ पट्ट शिष्य श्रीमद् संयमींद्रतीर्थ स्वाम्यांगॆलॆ दिव्य उपस्थितीरि  श्री सीताराम कल्याण महोत्सवु ता. २७-१२-२०१२ दिवसु विजृंभणेरि संपन्न जाल्लॆ. तत्संबंध देवता प्रार्थना, गुरु गणपति पूजन, श्री देवाक पंचामृताभिषेक, द्वादश कलशाभिषेक, सान्निध्य हवन, समावर्तन संस्कार, महापूजा, प्रसाद वितरण चल्लॆ. उपरांत श्री नंदकुमार कुड्व हांगॆलॆ बॆळुवायि घर्‍चान व्हॊरण बायर सरलॆ. पाणॆमंगळूरु मॊक्कां दाकूनु आय्यिलॆ प।पू।स्वाम्यांक स्वागत कॆल्ल उपरांत सीमंत पूजा, मांट्वॆक सीतादेविलॆ आगमन, फूल माळचॆ, दारॆमणि बांचॆ, कन्यादान, विवाह लग्ना होमु, लाजा होमु, अन्न संतर्पण इत्यादि कार्यक्रम चल्लॆ. दि॥ पं. भीमसेन् जोषि हांगॆलॆ शिष्य पं. उपेंद्र भट्, मुंबै आनि मंगळूरु निगमागम पाठशाळॆचॆ प्रिन्सिपाल् वे।मू। सुधाकर् भट् दाकूनु गीतरामायण विशेष आकर्षण जाव्नाश्शिलॆ. रूपकला कुंदापुर हान्नि प्रदर्शित कॆलीलॆ प्रसिद्ध मूरु मुत्तुगळु नाटकाचॆ १,००० प्रदर्शन चेल्नु, जमिलॆ भक्त लोकांक चांग मनरंजन मॆळ्ळॆ.
श्री महालसा नारायणी देवळ, शिर्व
उडुपि ता॥ शिर्व मंचकल् श्री महालसा नारायणी देवळांतु शतमानोत्सवु वर्षाचरणॆचॆ चंपाषष्ठि महोत्सवु ता. १८-१२-२०१२ दिवसु विजृंभणेरि चल्लॆ. तत्संबंध श्री देविक पंचामृताभिषेक, महापूजा, रात्ति पूजा जाल्ल नंतर विजयरथोत्सवु, रुप्पॆलालंखी उत्सवु, संतर्पण इत्यादि कार्यक्रम चलीलॆ खब्बर मॆळ्ळा. श्री देवळांतु मुखारि ता. २०-१-२०१३क विशेष फुल्लापूजा, सिंहपुरुष दर्शन, महापूजा, समाराधन हे पूरा कार्यक्रम चल्ता. तश्शीचॆ २-०३-२०१३क ४५चॆ हस्तांतर वर्धंति, ता. १०-३-२०१३क महाशिवरात्रि उत्सव प्रयुक्त भजन, श्री वीरभद्र देवाक रंगपूजा, २८-३-२०१३क २९चॆ पुनर् प्रतिष्ठा वर्धंति चॊलचॆ आस्स म्हणचॆ खब्बर मॆळ्ळा.
श्री पट्टाभि रामचंद्र देवळ, बारकूरु
बार्कूरु श्री पट्टाभि रामचंद्र देवळांतु श्री पट्टाभि रामचंद्र देवालॆ प्रतिष्ठा सुवर्ण महोत्सव वर्षाचरणॆचॆ पर्व कालांतु श्री काशीमठाधीश श्रीमद् सुधींद्र तीर्थ स्वाम्यांगॆलॆ पट्टशिष्य श्रीमद् संयमींद्र तीथ् स्वाम्यांगॆलॆ दिव्य उपस्थितीरि  ता. ७-०१-२०१३ दाकूनु ९-०१-२०१३ पर्यंत श्री देवता प्रार्थना, गणहोमु, महा पूजा, समाराधन, श्री फक्कीरप्प यमुनप्प भजंत्रि मुंडगोड दाकूनु शॆहनायि, प।पू। स्वाम्यांक पूर्णकुंभ स्वागत, पाद्यपूजा, आशीर्वचन, श्री राम रक्षास्तोत्र पठण, श्री रामतारक मंत्र जप, तप्त मुद्राधारणॆ, धार्मिक पुनरुत्थान सेवा मंडळि आनि श्री अनंत वैदिक केंद्राचॆ सदस्य दाकूनु स्तोत्र पठण आनि भजन. महा पूजा, श्री कोडिकल् नागराज् किणि आनि श्रीमति नम्रता नागराज किणि दाकूनु भजन् संध्या कार्यक्रम, सभा कार्यक्रम, प।पू। स्वाम्या दाकूनु आशीर्वचन  पाद्य पूजा, प।पू। स्वाम्यांगॆलॆ निर्गमन, श्री उदय प्रभु, भट्कळ दाकूनु ‘भजनामृत आनि रंगपूजा इत्यादि कार्यक्रम चलेलॆ खब्बर मॆळ्ळा.
श्री लक्ष्मी वॆंकटेश भजना मंदिर, सच्चेरिपेटॆ
कार्कळ ता॥ सच्चेरिपेटॆचॆ श्री लक्ष्मी वॆंकटेश भजना मंदिरांतु ता. २०-१२-२०१२क सुरुवात जालेलॆ २३ वर्षाचॆ नगर संकीर्तना भजना समारंभाचॆ मंगलोत्सवु ता. २३-१२-२०१२  दिवसु सांज्वाळा  सूरु जाव्नु २४-१२-२०१२दिवसु सक्काणि पूडॆ मंगळारणॆ पूजॆ बरोबरि समाप्ति जाल्लॆ. हे वेळ्यारि प्रार्थना, दीप प्रज्वलना, फुल्ला पूजा, देवाक विशेष अलंकार इत्यादि कार्यक्रम चलीलॆ खब्बर मॆळ्ळा.
शुभविवाह
चि॥ सचिन (श्रीमति आशा आनि श्री ऎ. प्रभाकर नायक्, हुब्बळ्ळि हांगॆलॊ पूतु) आनि चि॥सौ॥  निमॆशिका(श्रीमति आनि श्री नागेश कृष्ण भट्, यल्लापूर हांगॆलि धूव) हांगॆलॆ लग्न ता. ०६-१२-२०१२ दिवसु श्री लक्ष्मी वॆंकटरमण देवळाचॆ श्री वेदव्यास कल्याण मंटपांतु विजृंभणेरि चल्लॆ.
चि॥ चिंतना(डा॥ रामकृष्ण जायक् आनि डा॥ श्रीमति गीता आर्. नायक् हांगॆलॊ पूतु) आनि चि।सौ। नमृता(श्री शिवराम शॆट्टि आनि श्रीमति गीता शॆट्टि, आस्ट्रेलिया हांगॆलि धूव) हांगॆलॆ लग्न ता. २१-१२-२०१२ दिवसु सुधींद्र तीर्थ कल्याण मंटप, ४१ शिरूरु, हरिखंडिगॆ हांगा विजृंभणेरि चल्लॆ. व्हरडीकॆ गर्भरोहणु(संतोष कूट) ता. २२-१२-२०१२ दिवसु मणिपालांतु चल्लॆ.
दॊन्नी जोडि व्हरॆतु-वकलांक “सरस्वति प्रभा तरपेन देवु बरॆं कॊरॊं म्हणता.