कॊंकणि मांटॊव्
“कॊंकणि भावगीतॆंचॆ गायन मस्त कम्मि आस्स; हे दिक्कांतु युवकार आनि विद्यार्थि लोका कडेचान भावगीता बरोसूव्नु संगीत संयोजन कोर्नु, गायचॆ खात्तिरि तरबेति कार्यागार चलोवचाक ठरैला. म्हॊणु कर्नाटक कॊंकणि साहित्य अकाडॆमि अध्यक्ष कासरगोडु चिन्ना तान्नि सांगलॆ. अकाडॆमि तरपेन आल्तांतु कॊंकणि मांटॊव्ंतु चलेलॆ ’कॊंकणि संवेदना’ कार्यक्रमाचॆ अध्यक्षता घेव्नु तान्नि उलैताश्शिलॆ. कॊंकणि संवेदना कार्यक्रमांतु विशिष्ट सामर्थ्याचॆ कलाविद ख्यात तबला वादक मंगळूर्‍चॆ ऎस्. शिवानंद शेट् तांका गौरवार्पण तश्शीचि   तांगेल दाकूनु तबला वादन कार्यक्रम चल्लॆ. वॆंकटेश राव् (हार्मोनियं), शिल्पा, लोकेश् (कॊळलु) तान्नि साथ दिल्लॆ.
संवेदना कार्यक्रमांतु  विशिष्ट प्रतिभा आस्सुचॆ कॊंकणि मनुष्याक अपोव्नु, तांका सम्मान कोर्नु, कार्यक्रम प्रस्तुत करताति. शिवानंद शेट् तबलाचॆ अप्रतिम कलाविद जाव्नास्सति, तान्नि  कॊंकणिचॆ एकलव्य’ म्हॊणु कासरगोडु चिन्ना सांग्लिंति. ख्यात तबला कलाविद मंगलदास् गुल्वाडि कॆ. तान्नि हॊ कार्यक्रमाचॆ उद्घाटन कॆल्लॆ.  कॊंकणि संवेदना कार्यक्रमाचॆ मूखांतर  निप्पिलॆ कला प्रतिभावंतांक अवकाश मॆळचॆ वरि जांवॊ म्हॊणु तान्नि इच्छा व्यक्त कॆल्लिंति. संगीत कलाविद जालेलॆ वसंति आर्. नायक् आनि पत्रकर्त आग्नॆस् रॊड्रिगस् तान्नि मुखेल सॊयरॆ जाव्नु आय्यिलॆ.             अकाडॆमि सदस्य तश्शीचि कार्यक्रमाचॆ संचालक अशोक् शेट् तान्नि येव्कार कॆल्लॆ. रिजिस्ट्रार् डा। बि. देवदास् पै माम्मानि आबार मानलॆ. महेश् नायक् तान्नि कार्यक्रम निर्वहण कॆल्लि.
’कॊंकणि कुटुम् आवार्ड् - २०१२’
मॊबैल्, इंटर्नॆट्, फेस्‌बुक् हाज्जॆ जंजाटांतु मनुष्यु आपणालॆ आवय भास विसर्ता आस्स, मातृ भाषा विसर्लेरि आमगेलॆ भविष्याक गंडांतर आस्स म्हॊणु  ख्यात साहिति आनि लेखक वल्लि वग्ग मैसूरु तान्नि अभिप्राय पाव्लॆ. मंगळूर्‍चॆ सॆबस्टियन् प्लाटिनम् ज्युबिलि हालांतु “कॊंकणि कुटुंम् बह्रैन् तरपेन दिलेलॆ ’कॊंकणि कुटुम् आवार्ड् - २०१२’ घेव्नु तान्नि उलैताश्शिलॆ. मातृभाषॆक म्होगु आनि आदर दाखयका. आनि मातृभाषॆंतु प्रकट जावचॆ साहित्याक म्हॊल दिव्का. मातृभाषेक गौरव दीनाशि घॆलयारि स्वर्गांतू सैत जागो ना म्हणचॆ खबर आमका आस्सुका म्हॊणु तान्नि सांगलॆ.
हे समारंभाचॆ अध्यक्षता घेव्नु उलैलॆ कर्नाटक कॊंकणि साहित्य अकाडॆमि अध्यक्ष कासरगोडु चिन्ना, “चांग काम कॊरचॆ वेळ्यांतु त्या ऒप्पुनु घॆव्चॆ आनि ताक्का प्रोत्साह दिव्चॆ काम कॆलव लोक कर्नाति. खालि पॊडजाळ मात्र भॊगताति. हे भाषॆचॆ अभिवृद्धिक आड्बळ जात्तलॆ म्हळ्ळिंति.  “कॊंकणि भाषॆ उलैचॆ ४२ पंगड आस्सति. तान्नि उलैचॆ दाटिंतु भिन्नता आसलेरिचि सर्वालॆ दृष्टि एक्कचि. त्या कॊंकणि भाषॆचॆ गट्टिपण. त्या आनि इत्तुलॆ जागृत जाव्का, मातृभाषॆ वयचॆ म्होगु आमका स्पूर्ति जांवॊ. म्हळ्ळिंति. राक्णॊ हप्ताळ्याचॆ संपादक रॆ। फा। फ्रान्सिस् रोड्रिगस्, कॊंकणि प्रचार् संचलन् आडळित कार्यदर्शि विटोरि कार्कळ्, कार्यक्रम संघटक जालेलॆ टैटस् नॊरॊन्हा उपस्थित आश्शिलॆ.रिचर्ड् मोरस् तान्नि येव्कार कॆल्लॆ. विलियं प्रास् प्रशस्ति पत्र वाच्चिलॆ. वल्लि वग्ग मैसूरु तांका प्रशस्ति प्रदान चल्लॆ.
’घर् घर् कॊंकणि’
कुशाल, चर्चॆ, कुशलोपरि मिश्रित वातावरणांतु कॊंकणि आचार विचार, संगीत. साहित्य, जानपदाचॆ चंदाय दाखय्चॆ ’घर् घर् कॊंकणि’ सरणिचॆ पय्लॆ कार्यक्रम आल्तांतु मंगळूर्‍चॆ  डा। मोहन् पै तांगॆलॆ घर्‍कडॆ चल्लॆ. कर्नाटक कॊंकणि साहित्य अकाडॆमिन घाल्नु घॆत्तिलॆ हे कार्यक्रमाचॆ उद्घाटन अकाडॆमि अध्यक्ष कासरगोडु चिन्ना तान्नि कॆल्लॆ. अकाडॆमिचॆ रिजिस्ट्रार् डा। बि. देवदास् पै तान्नि प्रस्ताविक जाव्नु उलैलॆ.
‘घर यजमान्’ डा। मोहन् पै तान्नि कॊंकणि शास्त्रीय गायन प्रस्तुत कोर्नु कॊंकणि भाषॆचॆ व्हडपण सांगलिंति. ’घर्‌कारिणि’ उषा पै तान्नि कार्यक्रम निर्वहण कॆल्लि. जि‌ऎस्‌बि, सारस्वत, क्याथॊलिक्, दैवज्ञ समुदायाचॆ बरशि गोंय आनि केरळाचॆ उप भाषा प्रकाराचॆ विंगविंगड कॊंकणि उप भाषॆंतु वॊव्यॊ, म्डण्यो, कॊंकणि लोकवेद, कॊंकणि शिशुगीता, वाचन, म्हालगड्यालॆ आनि दाकय्ल्यालॆ संभाषण चल्लॆ. अकाडॆमि सदस्य जालेलॆ अशोक् शेट् आनि महेश् आर्. नायक् तान्नि उपस्थित आश्शिलॆ.