हुब्बळ्ळि जि.ऎस्.बि समाजाचॆ ६७चॆ “समाज डे
“वज्र कात्तर्लि तश्शि ताज्जॆ हॊळप चड्तॆ तश्शि, समाज बांधवांक परत परत संस्कार मॆळ्ता आय्यिल तश्शि तांगॆलॆ सद्घुणाचॆ हॊळप च्हड जात्ता अश्शि म्हॊणु श्री गोकर्ण पर्तगाळि जीवोत्तम मठाधीश श्रीमद् विद्याधिराज तीर्थ श्रीपाद वडेर स्वाम्यांनि सांग्लॆ. तान्नि ता. २४-०६-२०१२ दिवसु हुब्बळ्ळि गौड सारस्वत ब्राह्मण समाजाचॆ ६७चॆ “समाज डे चॆ दिव्य सानिध्य आनि अध्यक्षत घेव्नु उलैताश्शिलॆं. मुखार्सुनु उलैलॆ तान्नि “समान धर्म आचरण करतालॆ मेळ्नु समाज जात्ता. ज्ञान आनि त्याग आश्शिलॆ समाजाक ग्लानि ना.समाजाचॆ सर्व म्हाल्गडॆ सदस्यान संघटन कॆलॆलॆ निमित्त समाज एकत्र जाल्लॆ. आम्मि तांगेलॆ स्मरण कॆदनांयि करता उरका. म्हॊणूयि तान्नि सांग्लॆ. समारंभाक मुखेल सॊयरॆ जाव्नु भट्कळाचॆ समाज सेवक आनि शिक्षण तज्ञ श्री सुरेंद्र शानभाग तान्नि आय्यिलॆ. तान्नि उलोव्नु जि.ऎस्.बि. बांधव अपेक्षरहित जाव्नु निःस्वार्थानि जनसेवा करता आस्सति. आमगेलॆ स्वाभिमानि समाज, मातृऋण, पितृऋण, देवऋण, गुरुऋण म्हॊणु आश्शिल्वरि समाजऋण म्हॊणु आस्ता. समाजाचान घॆत्तिलॆ परत आम्मि आम्मि समाजाक दिव्का. आजि हुब्बळ्ळि, बॆंगळूर तस्सालॆ गांवांतु यव्नु स्थायि जाव्नु राब्बिलॆ प्रतिष्ठित समाज बांधवानि तांगॆलॆ मूळगांव्चॆ दुर्बल समाज बांधवांक मद्दत कॊरचाक मुखार यव्का. म्हॊणु तान्नि आपोव्णि दिल्लि.
वेदिकॆ वयरि प।पू। स्वाम्यांगॆलॆ बरशि सर्वश्री सुरेंद्र श्यानभाग, दिनेश पै, वि.जि. प्रभु, रामचंद्र कामत्, कृष्णकुमार पै, बॆळगांवि, श्रीपाद भट्, पुत्तु पै, समाजध्यक्ष आर्.ऎन्.नायक्, कार्यदर्शि वि.जि.शानभाग, उदय जि. शानुभाग आदि लोक उपस्थित आश्शिलॆं. सुरवेक श्री सदानंद ऎस्. कामत् तान्नि सर्वांक स्वागत कॆल्लि. समाजा तरपेन अध्यक्ष श्री आर्.ऎन्. नायक् तान्नि स्वाम्यांगॆलॆ पाद्यपूजा कॆल्लि. गौ.कार्यदर्शि वि.जि.शानुभाग तान्नि घॆलेलॆ वर्षाचॆ समाजाचॆ वरदि वाचन कॆलयारि, महिळा विभागाचॆ वरदि वाचन श्रीमति वंदना शानभाग तान्नि कॆल्लॆ. हेंचि संदर्भारि समाजाचॆ म्हाल्गडॆ सदस्यांगॆलॆ सन्मानु चल्लॆ. अवुंदु श्री ऎम्.ऎस्.गाय्तॊंडॆ, श्री वासुदेव गोविंद पै आनि श्री रमेश ऎम्. कामत् तांका समाजाध्यक्ष श्री आर्.ऎन्. नायक् माम्मानि शाल पांगूर्नु, फुळ्ळा माळ घाल्नु, यादगार दीव्नु सन्मान कॆलयारि, प।पू। स्वाम्यानि फलमंत्राक्षत दीव्नु आशीर्वादु कॆल्लि. सन्मानितांगॆलॆ परिचय श्री श्रीकांत महालॆ तान्नि कॆल्लॆ.
अवुंदु अत्युत्तम दार्लॊ स्वयंसेवक म्हॊणु श्री कृष्णानंद आर्. श्यानभाग आनि अत्युत्तम बाय्ल स्वयंसेवक म्हॊणु श्रीमति सुवर्ण सतीश महालॆ तांका विंचूनु हे संदर्भारि शील्ड् दीव्नु सन्मान कॆल्लॆ. ऎस्.ऎस्.ऎल्.सि., पि.यु.सिंतु चांग मार्क्स घॆत्तिल्यांक बहुमान आनि दत्तुस्वीकार योजनॆचॆ फलानुभविंक आर्थिक सहायु प।पू। स्वाम्यांगॆलॆ हात्तान वितरण जाल्लॆ. “राष्ट्रगीतॆ भरशि “समाज डे कार्यक्रम मुक्ताय जाल्लॆ.
तत्संबंध श्रीमद् विद्याधिराज तीर्थ स्वामॆं ता. २२-०६-२०१२ ताकूनु ०१-०७-२०१२ पर्यंत “सरस्वति सदनांतु मॊक्कां आश्शिलॆं. हे संदर्भारि प्रतिनित्य भजन, महापूजा, प।पू। स्वाम्यांगॆलॆ भीक्षा, पाद्यपूजा, सत्यनारायण पूजा, सांस्कृतिक कार्यक्रम जाव्नु “भक्त सुधन्व यक्षगान, कॊंकणि नाटक “गॊम्टॆ माम्मालॆ हिम्टपण, , भरत नाट्य, डा॥ पवन भट् दाकूनु कथा कीर्तना, मुंबैचॆ त्रिवेणि नाट्य कला संघ दाकूनु ऋणानुबंध म्हणचॆ कॊंकणि नाटक प्रदर्शन इत्यादि कार्यक्रम चल्लॆ. हुब्बळ्ळिचॆ अपार समाज बांधव पूज्य स्वाम्यांगॆलॆ आशीर्वाद घॆत्लॆ.
पोटॊ : नंदन यु. शानुभाU
ಕಾಮೆಂಟ್ಗಳಿಲ್ಲ:
ಕಾಮೆಂಟ್ ಪೋಸ್ಟ್ ಮಾಡಿ