शिरसिंतु जि.ऎस्.बि. सहमिलन कार्यक्रम
शिरसि जि.ऎस्.बि.समाजाचॊ समाजोत्सव विद्याधिराज कलाक्षेत्रांतु आल्तांत चल्लॊ. मुखेल सॊयरे जाव्न आयिल्लॆ कॆ.डि.सि.सि. ब्यांकाचॆ श्री सतीश जि. माविनकुर्वॆ तान्नि“ शिरसीचॆ जि.ऎस्.बि. समाजान समाजाक उपयुक्त जाल्लिं बांदप निर्माण कोर्नु समाजाक अर्पण कॆल्यांत म्हॊणु सांग्लॆं. ह्या संदर्भांतु श्री वॆंकटरमण देवस्थानाचॆ बांदकामाक २०१३ इसवीचॆ ऐ.सि.ऐ. अल्ट्राटॆक् प्रशस्ति मॆळ्ळिलॆ खात्तेर ह्या बांदपाचॆ नीलनक्षॆ तयार्नु, उस्तुवारि पळैलॆ इंजिनियरद्वय- श्री अरुण ऎम्. नायक आनि श्री प्रवीण ऎम्. नायक तश्सींचि कांट्राक्टर श्री गिरीश ऎस्. शानभाग बाळेरि हांकां समाजाचॆ म्हालगडॆ डा.वि.ऎस्.सोंदॆ, आनि मॊक्तेसर श्री विष्णुदास कासरकोड हान्नि इतर सॊयरॆ जवळ आत्मीय जावनु सत्कार कॆल्लॊ. राष्ट्रपति पदक पुरस्कृत श्री गोविंदराय शानभाग हान्नि, श्री हनुमंत देवळाचॆ आवारांतु निर्माण कोर्नु समाजाक अर्पण कॆल्लिल्या नवग्रह पीठ बांदोव्चांतु मद्दत कॆल्यिल्या ह्या तिग्गांकयी प्रत्येक जाव्नु सन्मानु कॆल्लॊ. सन्मानित श्री अरुण नायक हान्नि आमकां आमगॆल्या समाजा वतीन कॆल्लिलो हो सन्मानु अतीव आनंदाचॊ जाव्न आस्सा. म्हळ्ळिंति. थंयिं जमिल्या सर्व जनानि धीर्घ करताडन कोर्नु तांगॆल्या उतरांक संतोष व्यक्त कॆल्लॊ. ह्या संदर्भांतु क्रीडा क्षेत्रांतु विशेष साधनॆ कॆल्लिल्या श्री सुदाम पै हांकां समाजा तर्फेन सत्कार कॆल्लॊ.
शिरसि अर्बन् ब्यांकाचे जनरल् म्यानेजर श्री पांडुरंग पै हान्नि मुखेल सॊयर्यालॆ आनि श्री राजेश पै, श्री आनंद कामत हान्नि संमानितांलो परिचय कॆल्लॊ. डा.वि.ऎस्.सोंदॆ सभॆचॆ अध्यक्ष जाव्नु आशिल्लॆ. मॊक्तेसर श्री विष्णुदास कासरकोड, श्री मोहन जनार्धन नायक, श्री ऎं.ऎस्.प्रभु, सहमिलन कार्यक्रमाचॆ कार्याध्यक्ष श्री दयानंद चित्रिगि हान्नि सर्व उपस्थित आशिल्लॆ. श्री वासुदेव शानभाग हान्नि सन्मानित श्री गिरीश शानभाग हांगॆलो परिचय कोर्नु कार्यक्रमाची निर्वहण कॆल्लि. ह्या कार्यक्रमांतु समाजाचॆ चॆर्डुवांक, बाय्लांक, आनि युवकांक प्रत्येक जाव्नु मनरंजनात्मक विविध स्पर्धॆ आयोजित कॆल्ललॆ. श्री वासुदेव शानभाग हान्नि प्रस्तुत कॆल्लिलॆ आम्मि जि.ऎस्.बि. लोक म्हळ्ळॆ जि.ऎस्.बि. लॊकालॆं इतिहासा बद्दल आशिल्लें पॊवर पॊयिंट प्रॆसॆंटेशन् जनांक खूप आवड्लॆं.
वरदि : वासुदेव शानभाग, शिरसि.
श्री रामचरित प्रकटणा निर्धार.
श्री विश्वनाथ शेट हार्सिकट्टा हान्नि सतत धा वर्ष परिश्रम कोर्नु भामिनि षट्पदींतु व्याकरणबद्द जाव्नु रचन कॆल्लिलॆ कॊंकणि महाकाव्य श्री रामचरित हॆं एक महाकाव्य जाव्नु आस्सूनु सुमार १४०० पुट तित्तुलॆ बृहत् हे ग्रंथाचॆ प्रकटण कॊरचॆ कार्य रजत महोत्सवाचॆ हॆब्बाग्लांतु आस्सुचॆ उत्तर कन्नड जिल्ला कॊंकणि परिषत्तानि घॆत्ल्या. हे संबंधि घटन कॆलेलॆ महाकाव्य प्रकटणा समिति सभा आल्तांतु चल्लॆ. हे सभाक मुखेल सॊयरॆ जाव्नु ख्यात साहिति शा.मं. कृष्णराय आय्यिलॆ.
ह्या महान् कार्याक सुमारु आठ लाख रूपायि खर्चु लागतलो अश्शिं अंदाज कॆल्ला. ह्या पुण्या कामाक कॊंकणि भाषिक सर्व जनानि हात मेळोव्का जाल्ला. ह्या प्रकटणा कार्याक डा.वि.ऎस्.सोंदे हांगॆल्या अध्यक्षतॆंतु एक प्रकटणा समिति तयार कॆल्ला. शिरसि अर्बन् ब्यांकाचॆ विश्रांत जनरल् म्यानेजर श्री ऎं.ऎस्.प्रभु ताक्का कार्याध्यक्ष जाव्नु, श्री जि.ऎस्.सानु उपाध्यक्ष जावनु आस्साति. श्री रामचंद्र नायक बॆण्णॆ हान्नि खजांचि जाव्नु आस्सति. यवचा मे म्हैन्यांतु आयोजन कॆल्लिल्या उत्तर कन्नड जिल्ला कॊंकणि परिषत्ताचॆ रजत महोत्सवा वेळारि तें उजवडाक हाडचि योजन घाल्नु घॆत्ल्या. ह्या महाकाव्याचॆं मोल आठशें रुपयेपेक्षां जास्त जाल्यारी प्रकटणा पूर्व ताक्का सातशें रूपायि म्हण्णु निक्कि कॆल्यां. कॊंकणि भाषिक जनानि प्रकटणा पूर्व मोल दीवनु तें पैलें खरीदिकोर्नु ह्या कार्याक हात मेळोव्का जाल्ला. चड्त माहितिक उत्तर कन्नड जिल्ला कॊंकणि परिषत्त(रि) शिरसि - ५८१४०१(उ.क.) हांका संपर्कु कॊरयेत. आनि हे खात्तिरि शिरसि अर्बन् ब्यांकाचॆ प्रधान शाखॆंतु आस्सुचॆ ऎस्.बि. खाता नं २७०६५ हाक्कायि दुड्डु घाल्नु सहकार दिव्येत.
वरदि : वासुदेव शानभाग, शिरसि.
श्रीमद् सच्चिदानंद सरस्वती स्वामीजि पुण्यतिथि
श्री कैवल्यमठाधीश श्रीमद् सच्चिदानंद सरस्वती स्वाम्यांगॆलॆ १०चॆ पुण्यतिथि-संस्मरणॆ धार्मिक कार्यक्रम आल्तांतु मुंड्कूरु श्रीविठोभा देवळांतु चल्लॆ. श्रीकैवल्य संस्थानाचॆ शिष्यवर्ग जालेलॆ साणूर्कार् वॆंकटेश नरसिंह भट् आनि कुटुंबा तरपेन श्रीक्षेत्रांतु शाश्वत पूजा आनि गुरु पूजना, समाराधन, धार्मिक अनुष्ठान चल्लॆ. क्षेत्र्राचॆ अर्चक वेदमूर्ति विनायक भट् तान्नि पूजाविधि चलैलॆ. म्हाल्गडॆ वॆंकटेश् भट्, श्रीदेवळाचॆ आडळित मंडळि सदस्य, श्रीविठोभा भजना मंडळि, महिळा भजकवृंद, प्रेरणा युवजन संस्थॆचॆ सदस्य , सच्चेरिपेटॆ श्रीलक्ष्मीवॆंकटेश भजना मंदिराचॆ सदस्य, गांव्चॆ जिऎस्बि धा समस्थ धार्मिक कार्यक्रमांतु वांटॊ घॆत्लिंति. वरदि:- बि.पुंडलीक मराठॆ शिर्व
ಕಾಮೆಂಟ್ಗಳಿಲ್ಲ:
ಕಾಮೆಂಟ್ ಪೋಸ್ಟ್ ಮಾಡಿ