कॊंकणि आस्ति बस्ति वामन शॆणै

“बस्ति वामन शॆणै मामु खरेचि “कॊंकणि आस्ति तांगॆलॆ ताकूनु कॊंकणि भास आनि संस्कृति क्षेत्र पाच्वॆ जाल्या. तान्नि कॊंकणि भाषा क्षेत्रांतु  क्रांतिकारक, गुणात्मक सुधारण आनि बदलावण जावचाक कारणीभूत जाल्लिंति. तस्सालॆ मेरु व्यक्तित्वद कॊंकणि आस्ति ‘बस्ति माम्मांक आत्त गोंय्चॆ कॊंकणि अकाडॆमिचॆ प्रतिष्ठित माधव मंजुनाथ श्यानुभाग प्रशस्ति आल्तांतु गोंय्चॆ पणजिंतु हर्दॆ भरिलॆ संमाना बरशि पावित कॆलेलॆ कॊंकणिगांक पूरा गर्वाचॆ विषयु.  बस्ति वामन शॆणै म्हळसताक मनांतु यवचॆ तान्नि कॊंकणि भास, संस्कृति आनि जनांगाक कॆलेलॆ सेवा. तांगॆलॆ स्वास  स्वासांतु कॆदनांयि कॊंकणि भास आनि संस्कृतिचॆ  ध्यान. कॊंकणिगालॆ कूळार म्हणोनु घॆव्चॆ गोंय्चॆ  (राज्याचॆ) बायरि आस्सुचॆ कॊंकणिगांक  कॊंकणि भास, साहित्य, कला, संस्कृतींचॆ उदर्गति खात्तिरि जीवमान सगळॆ कॆलेलॆ सेवा, साधन परिगणन कोर्नु हे प्रशस्तिक विंचिताति. प्रप्रथम जाव्नु  कॊंकणि भीष्मा म्हणोवनु घॆत्तिलॆ दि। कॆ.कॆ. पै तांका हे प्रशस्ति पावित जालेलॆ.
श्री वामन शॆणै मामु आपणालॆ बापयि दि॥ बस्ति माधव शॆणैयांगॆलॆ नायकत्व, परोपकारि, स्वार्थ रहित गुण घेव्नु वाड्डिलॆं. विद्यार्थि जीवनांतु “शशि किरण म्हणचॆ कन्नड हात् पत्रिका दि॥ सर्वोत्तम श्रीधर भंडारकार तांगॆलॆ बर्शि मेळ्नु बाय्र काड्नु, प्रख्यात कॆलेलॆ हान्नि बंट्वाळाचॆ एर्य लक्ष्मीनारायण आळ्व तांगेलॆ मार्गदर्शनारि साहित्य तश्शीचि सामाजिक क्षेत्रांतु नांव पाव्लिंति. वामन शॆणै मुखारि ब्यांकिंग् क्षेत्रांतु दि। टि. ऎ. पै तांगेलॆ  मार्गदर्शनारि सिंडिकेट् ब्यांकांतु दक्ष आफीसर् म्हॊणु ३० वर्ष काळ सार्थक सेवा पावय्लिंति. मुखारि  दि। कॆ.कॆ. पै माम्मालॆ निकटवर्ति जाव्नु तांगॆलॆ मार्गदर्शनारि सामाजिक, सांस्कृतिक तश्शीचि कन्नड, तुळु आनि कॊंकणि भाषा क्षेत्रांतु आपणांक अर्पण कोर्नु घॆतलींति.
हान्नि सेवा कॆलेलॆ क्षेत्र एक्दोनि न्हंहि. बंट्वाळाचॆ  मल्लकंभ ख्यातिचॆ यशवंत व्यायाम शाळॆचॆ अध्यक्ष जाव्नु १९८७ंतु १६चॆं “तुळु केसरि कुस्ति खेळु न भूतो न भविष्यति म्हण्चॆ वरि बंट्वाळांतु व्यवस्थॆ कॆलेलॆ कीर्ति हांका पाव्का. न्हंहिसि सरस्वती कला प्रसारक संघ, सरस्वती संगीत शाळॆचॆ निर्माणाक कारणीभूत जाल्लॆ. . कुग्राम जालेलॆ तुंबॆंतु “तुंबॆ विद्या संस्थॊ यशस्वि जाव्नु सेवा निरत जाव्नास्सलेरि तांतु हांगॆलॆ वाव्रो आस्स. प्रथम विश्व कॊंकणि तश्शीचि प्रथम विश्व सारस्वत समावेश अत्यंत अर्थपूर्ण जाव्नु तश्शीचि कॊंकणि भास आनि समाजाचॆ अभ्युदयाक पूरक जाव्चॆ वरि संघटन कॊरचांतु बस्ति वामन शॆणैलॆ पात्र व्हड आश्शिलॆं म्हण्का. ताक्क्क अर्ह जाव्नु तांका "विश्व कॊंकणि सरदार’ आनि "विश्व सारस्वत सरदार’ म्हणचॆ बिरुद दीव्नु गौरव कॆलेलॆ सुयोग्य जाव्नु आस्स. आपणान इस्कूल् शिकचॆ दिवसांतु बाप्पा, कॊंकणि संशोधक दि। बस्ति पुंडळीक शॆणैनि तॆद्दना "सारस्वत’ पत्रिकॆंतु बरयता आश्शिलॆं कॊंकणि लेखन निमित्तान प्रभावित जाव्नु तश्शीचि मावळॊ दि। कॆ. अनंत कामत तांगेलॆ ताकूनु नाटक तरबेति घेव्नु बस्ति वामन शॆणैनि मुखारि कॊंकणि साहित्य आनि नाटक क्षेत्राक लाग्गि जाल्लिंति. "बस्ति प्रकाशन’ कोर्नु कॊंकणि साहित्य प्रकाशनाक हातु घाल्लिंति. संतोष कुमार गुल्वाडिन संपादन कॆलेलॆ ता ता तिंगण, डा। ज्योत्स्ना कामत् तान्नि संपादन कॆलेलॆ सुरग्यासर शब्द रत्नाकर, ऎं. माधव पै हांगॆलॆ संस्कृत (तद्भव) कॊंकणि शब्दकोश आनि बस्ति पुंडळीक शॆणैनि संपादन कॆलेलॆ १०,००० कॊंकणि शब्दांचॆ शब्दकोश बस्ति प्रकाशन तरपेन हुज्वाडाक आयला. बस्ति वामन शॆणै माम्मानि आपणालॆ कॊंकणि ल्हान काण्या संग्रह “ऎमिलि तश्शीचि  आधुनिक तॆन्नालिराम माटुंपय्य बरोवनु छापिला.  कॊंकणि जगांतु स्मरण वच्चनात्तिलॆ तित्तुलॆ काम कॆलेलॆ बस्ति वामन शॆणैनि   १९९२ंतु सिंडिकेट् ब्यांकाचान निवृत्त जाल्ल उपरांत डैरॆक्ट जाव्नु कॊंकणि क्षेत्राक उडलींति म्हळ्यारि चूख जायसना.  कॊंकणि भाषा मंडळ कर्नाटक संस्थॆचॆ अध्यक्ष जाव्नाश्शिलॆं  पौल् मॊरास् तांगेलॆ अपेक्षॆ प्रमाण कर्नाटक राज्यांतु कॊंकणि भास, साहित्य, संस्कृतिंचॆ अभिवृद्धि खातिर कर्नाटक सरकाराक ऒत्तायु कर्ता, कॊंकणि अकाडॆमि मागणि मुखार दवरूनु सुरुवात कॆलेलॆ कॊंकणि जाथा चळ्वळीचॆ संघटना कार्यदर्शि जाव्नु, राज्याचॆ विंग विंगड बगलेन घूव्नु, कॊंकणिगांक पूरा एक्कडॆ हाड्नु, बॆंगळूराक जाथा घेव्नु वच्चूनु राज्यपालांक आनि मुख्यमंत्रिंक भॆट्टूनु मनवि दीव्नु आय्लिंति. १९९४रल्लि ऎं. वीरप्प मॊयलि राज्याचॆ मुख्य मंति जाल्लिंति. बस्ति माम्मालॆ सतत प्रयत्नांक तान्नि चांग जाव्नु स्पंदन कोर्नु  कर्नाटक कॊंकणि साहित्य अकाडॆमि स्थापन कॆल्लिं. नैसि बस्ति वामन मामु  १९९७ ताकूनु २००१ पर्यंत कॊंकणि अकाडॆमिचॆ अध्यक्ष जाव्नु अकाडॆमिचॆ मुखारचॆ ध्येय धोरणॆंचॆ खात्तिर भद्र नॆल्कट्ट घाल्लिंति. राष्ट्राचॆ राजधानि डॆल्लिंतु डॆल्लि कॊंकणिगालॆ सहकार घेव्नु  ३ दिवसाचॆ बृहत् कॊंकणि कला सांस्कृतिक उत्सव आयोजन कॆल्लॆ. १९९५रल्लि प्रप्रथम विश्व कॊंकणि सम्मेळनद पूर्व तयारि खात्तिरि जगदाद्यंत आस्सुचॆ कॊंकणि भाषिकांक मॆळचाक  बस्ति वामन शॆणैनि  विंग विंगड योजन घाल्नु घॆत्लॆ.  डॆल्लिचान कॊच्चि पर्यंत विंगविंगड  राज्यांतु  प्रवास कोर्नु ७५ प्रादेशिक समिति रचन कॆल्लॆ. विश्व कॊंकणि सम्मेळनचान प्रेरण घेव्नु उत्तर अमेरिकाचॆ   कॊंकणिगान १९९६ंतु प्रप्रथम जाव्नु उत्तर अमॆरिक कॊंकणि सम्मेळन आयोजन कॆल्लॆ. विश्व कॊंकणि सरदार बस्ति वामन शॆणैंक विशेष जाव्नु आपोवनु घेव्नु तांगॆल ताकूनु सम्मेळन उद्घाटन करैलॆ. आत्त परत  २०१२चॆ जूनांतु उत्तर अमॆरिकांतु घडचॆ कॊंकणि सम्मेळनाक बस्ति वामन शॆणैंक आह्वान आयला.
मंगळूरु शक्तिनगरांतु ३ ऎकरॆ जागॆंतु जगाचॆ सर्व बगलेन पसर्‍लिलॆ कॊंकणिगालॆ अभिमानाचॆ संभ्रमाचॆ साधनॆचॆ ऒळक जाव्नु विश्व कॊंकणि केंz मात्तॆ उबोर्नु राबला. हे वामन शॆणै माम्मालॆ अद्वितीय साधन. हांगॆलॆ सपनाचॆ  योजन जालेलॆ विश्व कॊंकणि साहित्य अकाडॆमि तरपेन सबार चांग मौल्ययुत  साहित्य कृतियो प्रकाशन जाल्ल्या. कॊंकणि कृति इंग्लिष्, हिंदि, मलयाळं, कन्नड भाषॆंक अनुवाद जाव्नु प्रकाशित जाल्लिंति. केंद्र साहित्य अकाडॆमि ताकूनु अनुवाद प्रशस्ति लाभला. आल्तांतु बस्तिंगॆलॆ आन्नेक कार्यक्रम विश्व कॊंकणि नाटक अकाडॆमि स्थापन जाव्नु कॊंकणि नाटक क्षेत्राक राष्ट्रीय, अंताराष्ट्रीय मट्टाक घेव्नु वच्चॆ  प्रयत्नांक नांदि बरैला. कॊंकणि रामायण खात्तिर राष्ट्रीय संवाद, कॊंकणि महाकवि बाकिबाब शताब्दि, कॊंकणि नाटक क्षेत्राचॆ खात्तिर राष्ट्रीय विचार संकिरण, कॊंकणि चर्डुंवालॆ  रंगभूमि योजन बस्ति हांगॆलॆ सपना चरड. चर्डुंवालॆ रंगभूमि योजनॆ तॊग्गु आल्ताचॆ दोन वर्षांतु ३ चर्डुंवा नाटकं( (कुंड्या कुर्कुळ, पात्तूळि रूकु, चंद्रहास) केरळ, चॆन्नै तश्शीचि बॆंगळूर्‍चान कारवार परियंत २२ जागेंतु   प्रदर्शन जाल्या.
आपणालॆ हे पूरा साधनेंक दुड्वा मदत् दिवचॆ  डा । पि. दयानंद पै, रॊनाल्ड् कॊलासॊ, टि. वि. मोहनदास पै, रामदास कामत् तश्शीचि सलह दिवचॆ उदय् ऎल्. भॆंभॆ, डा। तानाजि हळरणकर, पुंडळीक ऎन्. नाय्क तश्शीचि निरंतर सहकार दिवचॆ कुड्पि जगदीश शॆणै, प्रदीप जि. पै, वॆंकटेश ऎन्. बाळिगा, कॆ. गोकुल्‌दास प्रभु, मॆल्विन् रॊड्रिगस्, पय्यनूरु रमेश पै, डा। सि. ऎन्. शॆणै (मुंबयि) आदि लोकांक  बस्ति वामन मामु कॆदनांयि यादु कर्ता उरताति. बस्ति शॆणैमामु कॊंकणि जनमनांतु सुभद्र जाव्नु उरलींति. न्हंहिसि कॊंकणिगालॆ चारित्रिक, भौगोळिक प्रांतीय बोलि  जांवॊ लिपिंचॆ संघर्ष आनि भिन्नत बगलेन दवरूनु सर्व जाति मताचांक कॊंकणि भास, संस्कृतिंचॆ अभिवृद्धिंतु एकत्र कॊरचांतु महान् वाव्रो कॆल्लिंति. कर्नाटक राज्योत्सव प्रशस्ति विजेत, विश्व कॊंकणि सरदार बस्ति वामन शॆणैंक आत्त गोवा कॊंकणि अकाडॆमिन, माधव मंजुनाथ शानभाग जीवमान साधनॆ प्रशस्ति दित्ता आस्सुचॆ त्या प्रशस्तीक एक वजन हाणु दिल्ला म्हळयारि चूख जायसना. कॊंकणि आस्ति श्री बस्ति वामन शॆणै माम्मांक सरस्वति प्रभाचॆ समस्त वाचक तरपेन हे मूखांतर अभिनंदन पावैता आस्स. तांगॆलॆ कीर्ति दशदिक्कांतु पसरॊ, तांका देवु बरॆं कॊरॊं.
(विंगविंगड मूलाचान संग्रह कॆलेलॆ)